İş adamı ilə bağlı yenidən məhkəməyə müraciət edildi

Bakıda dələduzluqda təqsirləndirilən iş adamı Müşfiq Muxtarovun barəsindəki hökmdən kassasiya şikayəti verilib.

 
Azdin.az-ın əldə etdiyi məlumata görə, şikayət Ali Məhkəmənin hakimi Şahin Yusifovun sədrliyi ilə araşdırılacaq. Məhkəmənin ilkin hazırlıq iclası oktyabrın 17-nə təyin edilib.

Bakı Ağır Cinayətlər Məhkəməsinin hökmü ilə M.Muxtarova bəraət verilib və o, məhkəmə zalından azadlığa buraxılıb. 
Qeyd: O, 2020-ci ilin sentyabrında həbs olunub. M.Muxtarov Cinayət Məcəlləsinin 178.3.2 (külli miqdarda ziyan vurmaqla dələduzluq), 195 (qanunsuz kredit alma və ya kreditdən təyinatı üzrə istifadə etməmə) və 308-ci (vəzifə səlahiyyətlərindən sui-istifadə) maddələri ilə ittiham olunurdu. İttihama əsasən, M.Muxtarov Loğman Hacıyevdən xaricdən qızıl külçələr gətirib, qazanc əldə etmək adıyla üç dəfəyə 2 milyon 19 min pul alıb və qaytarmayıb. M.Muxtarov isə özünü təqsirli bilməyərək ifadəsində bildirib ki, L.Hacıyev birgə biznes məqsədilə ona cəmi 1 milyon 600 min manat pul verib. İş adamının sözlərinə görə, bunun müqabilində də 200 min qazanc götürüb: “Devalvasiyadan sonra işlərin yaxşı getmədiyini, qazanc olmadığını gördüm və 1 milyon 600 min manatını qaytardım. O, devalvasiya olduğunu əsas gətirib, məndən pulu dolların əvvəlki kursuyla hesablayıb, tələb etməyə başladı. Görəndə ki, məndən əlavə pul ala bilmir, əsassız şikayətlər yazmağa başladı”.

L.Hacıyev isə dindirilən zaman deyib ki,M.Muxtarova verdiyi pulun 810 min manatı özünün, 741 min manatı qardaşının, 468 min manatı isə başqa Müzəffər Həsənov adlı tanışının olub. Onlar da qızıl külçə biznesinə sərmayə yatırmaq məqsədilə pul veriblər. M.Muxtarov isə bunu da təkzib edərək deyib ki, əksinə, Loğman Hacıyev ona birgə işlərindən qardaşı və başqa tanıdıqlarının xəbərinin olmamasını istəmişdi.
Xəbər lenti
Çox oxunanlar