Qardaşı qətlə yetirilən şəxs məhkəmədən sonra şahidi döydü - HƏBS

Bakı Apellyasiya Məhkəməsində qəsdən sağlamlığa ağır zərər vurmada təqsirləndirilən Ceyhun Abulovun barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası başa çatıb. 


Azdin.az-ın əldə etdiyi məlumata görə, hakim Həsən Əhmədovun sədrliyi ilə keçirilən prosesdə qərar elan olunub.

Qərara əsasən, apellyasiya protesti təmin edilib, Bakı Ağır Cinayətlər Məhkəməsinin çıxardığı şərti cəza dəyişdirilib. Belə ki, təqsirləndirilən şəxsə 2 il 7 ay 10 gün müddətinə azadlıqdan məhrumetmə cəzası təyin edilib, onun barəsində seçilmiş başqa yerə getməmək haqqında iltizam qətimkan tədbiri ləğv olunub. Ceyhun Abulov barəsində həbs qətimkan tədbiri seçilib və o, dərhal məhkəmə iclas zalından həbs edilib. İttihama görə, Ceyhun Abulov 2022-ci il aprelin 27-si, saat 17 radələrində Bakı Ağır Cinayətlər Məhkəməsində qardaşı Cabir Abulovun öldürülməsi ilə bağlı keçirilən məhkəmə prosesi yekunlaşdıqdan sonra həmin cinayət işi üzrə şahid qismində iştirak edən, zərərçəkmiş Akif Cəbiyevə yaxınlaşıb. O, həmin şəxsdən baş vermiş hadisənin təfərrüatları, yəni hadisə zamanı orada digər şahidlərin olub-olmamasını soruşub. Akif isə onun verdiyi suallara cavab verməyərək kobud formada Cabir Abulovun ölümünün onun üçün maraqsız olduğunu deməklə uzaqlaşmaq istəyib. Bu zaman Ceyhun zərərçəkmiş şəxsi məhkəmənin inzibati binasının qarşısından kənara keçməyi və başqa şəxslərin olmadığı yerdə danışmağı təklif edib. Onlar “Grandmart” mağazasının yaxınlığında söhbət edərkən Akif Cəbiyev onun suallarına yenidən cavab verməyib, əli ilə Ceyhunu itələyib. Daha sonra təqsirləndirilən şəxs əvvəlcə yumruq və təpik zərbələri ilə qəsdən zərərçəkmiş şəxsi vurub. Nəticədə Akif Cəbiyevin qarın nahiyəsi cırılıb, sol qulaq seyvanı əzilib. Bundan başqa, Ceyhun zərərçəkmiş şəxsin ona doğru gəlməyə davam etdiyini gördükdə isə gücü çatmayacağını düşünüb üzərindəki bıçağı cibindən çıxararaq, Akifin müxtəlif nahiyələrinə qəsdən zərbələr endirib.

Qeyd: Ceyhun Abulovun böyük qardaşı Cabir Abulov 2021-ci il sentyabrın 15-i gecə saat 2 radələrində Sabunçu rayonu ərazisində İlqar İsmayılov tərəfindən qətlə yetirilib. Məhkəmə iclasında İlqar İsmayılov ittiham üzrə özünü təqsirli bilməyərək, ona bəraət verilməsini istəyib. Bildirib ki, Cabir Abulovu o, yox, Akif Cəbiyev öldürüb. Onun sözlərinə görə, Cabirə zərbə vuranın kim olduğunu hadisə yerində olan şəxslər çox yaxşı bilir, sadəcə təzyiq göstərildiyindən, onlar düzgün ifadə verməyiblər. Bakı Ağır Cinayətlər Məhkəməsinin hökmü ilə İlqar İsmayılov cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum olunub.
Xəbər lenti
Çox oxunanlar