Səhlənkarlıqda günahlandırılan "Azərişıq" ASC-nin əməkdaşının cəzası ağırlaşdırıldı

Şirvan Apellyasiya Məhkəməsində səhlənkarlıqda təqsirləndirilən Telman Əhmədovun barəsindəki hökmdən verilən apellyasiya şikayəti üzrə məhkəmə iclası başa çatıb.
 
Azdin.az-ın əldə etdiyi məlumata görə, hakim İlkin Abdullayevin sədrliyi ilə keçirilən prosesdə qərar elan olunub.
 
Qərara əsasən, təqsirləndirilən şəxsin apellyasiya şikayəti təmin olunmayıb, zərərçəkmişin hüquqi varisinin apellyasiya şikayəti qismən təmin edilib, Cəlilabad Rayon Məhkəməsinin çıxardığı 5 il müddətinə azadlığın məhdudlaşdırılması (elektron qolbaq) cəzası dəyişdirilib. Ona 3 il 6 ay müddətinə azadlıqdan məhrumetmə cəzası təyin edilib. Qərarda qeyd edilib ki, Telman Əhmədov cəzasını məntəqə tipli cəzaçəkmə müəssisəsində çəkəcək.
 
Qeyd: 08.02.2022-ci il tarixdə Cəlilabad rayonunun Ocaqlı kənd 1 nömrəli tam orta məktəbinin 1-ci sinif şagirdi, 2015-ci il təvəllüdlü Hüseyn Zeynalovun təhsil aldığı məktəbin həyətində elektrik cərəyanı vurması nəticəsində ölməsi faktı ilə bağlı Cinayət Məcəlləsinin müvafiq maddəsi ilə başlanmış cinayət işinin ibtidai istintaqı tamamlanıb.
 
İstintaqla “Azərişıq” ASC-nin Cənub Regional Enerji Təchizatı və Satışı İdarəsinin Cəlilabad Elektrik şəbəkəsinin kənd-1 sahəsi üzrə usta vəzifəsində işləyən Telman Əhmədovun öz xidməti vəzifələrini yerinə yetirməməsi səbəbindən Hüseyn Zeynalovun elektrik cərəyanı vurması nəticəsində ölməsinə əsaslı şübhələr müəyyən edilib.
 
Toplanan sübutlarla Telman Əhmədova Cinayət Məcəlləsinin 314.2-ci (səhlənkarlıq ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə yekun ittiham elan edilərək cinayət işi baxılması üçün Cəlilabad Rayon Məhkəməsinə göndərilib.
 
Cəlilabad Rayon Məhkəməsinin hökmü ilə 5 il müddətinə azadlığın məhdudlaşdırılması (elektron qolbaq) cəzasına məhkum edilib. Hökmdən narazı qalan məhkum və zərərçəkmiş şəxsin hüquqi varisi və mülki iddiaçı Zeynalov Yaşar Şəmsəddin oğlu apellyasiya şikayəti veriblər. Şirvan Apellyasiya Məhkəməsi Telman Əhmədovun apellyasiya şikayətini təmin etməyib. Yaşar Zeynalov tərəfindən verilmiş apellyasiya şikayəti təmin olunub.
 

Belə ki, Cəlilabad Rayon Məhkəməsinin hökmü zərərçəkmiş şəxsin hüquqi varisi tərəfindən verilmiş apellyasiya şikayətinə münasibətdə dəyişdirilib. Məhkumun barəsində 2 il müddətinə azadlıqdan məhrumetmə cəzası təyin edilib. Telman Əhmədov cəzasını məntəqə tipli cəzaçəkmə müəssisəsində çəkəcək. Ali Məhkəməsinin qərarına əsasən, aşağı instansiya məhkəməsinin çıxardığı qərar tamamilə ləğv edilib, iş yenidən baxılması üçün apellyasiya instansiyası məhkəməsinə göndərilib.